من الأول كان في هجوم في جبل مويا، ونحن حلتنا قريبة مِنّه، ومن بداية الاشتباكات أنا قمت سقت ناس بيتنا ودّيتهم حلة شويه أبعد في شرق سنار. يوم السبت بتذكّر فتحت فيسبوك، لقيت صاحبي كاتب بوست وهو ساكن قرية (القويزات)، والقرية دي فيها طريق تهريب ما فيهو حركة كتيرة، بربط بين جبل مويا وسنجة، مروراً بي حلة اسمها محبوبة؛ لقيتو كاتب إنو يا أخوانا في حالة هلع وتوتر؛ رسلت ليهو عشان أفهم الحاصل شنو، قال لي في أكتر من 250 عربية بتاعت دعم سريع ماشة على سنجة، الكلام دا حوالي الساعة 11، وأنا صراحة ما اهتمّيت شديد، قلت يمكن الحاجة الشافها دي متحرك بتاع جيش، وهو ما قِدِرْ يِمَيِّزْ بينهم، بعد ساعة ونص اتصلت على صاحبي في سنجة سألتو، وفعلاً قال لي في عربات داخلة هو ما شافها، لكن سمع كدا، أغلب الناس استنكرت لأنو سنار فيها جيش، ومستغربين الدعامة جوا من وين وكيف، لكن فوراً قررنا إنو بغض النظر عن الحاجة الحتحصل دي نحن لازم نطلع لأنو ما عايزين نتعرّض لانتهاكات.

وطبعاً سنجة ما حصل فيها أي اشتباك من الصباح الساعة 11. الجيش دا انسحب بكل بساطة، مشوا شرق سنار، قطعوا بكوبري ود العيس وقعدوا ورا الكوبري وسنجة في الاتجاه الغربي، وحتى أصوات الرصاص الكُنّا سامعينها كانت احتفالات الدعم السريع بأنهم دخلوا سنجة ما كان في أي مقاومة أو اشتباكات.

نحن قاعدين في حلة قريبة من السوكي وقررنا تاني يوم طوالي نسافر القضارف. يوم الأحد جبنا دفار بتاع واحد خالنا كدا، ونحن أكتر من تسعة أو عشرة أُسَر، ركبنا الدفار دا وصلنا الدندر وهي أول حلة بعد السوكي طوالي، وفيها الكوبري بتقطعوا عشان تمشي الاتجاه الشرقي للدندر، وبعد داك بتبدا حدود ولاية القضارف كان في الآلاف من الناس، نحن ماشين في تمنية مسارات في الطريق والكوبري بشيل عربية واحدة بس للعبور، وهو كوبري قديم شديد بتاع حديد من زمن الإنجليز، وفيهو مسار سكة حديد، وعربيتنا ما قدرت تصل الكوبري بسبب الزحمة الفظيعة دي من 8 صباحاً لحدي 12 بالليل، وبعد داك زي الساعة 1 صباحاً جات عربات الجيش ومشت على القضارف، في اللحظة ديك عرفنا إنو خلاص سنجة دي ما فيها أمل ولازم نكمل مشي، وخايفين إنو الدعامة يجونا في الكوبري، وفعلاً كل همنا كان إنو بس نقطع الكوبري، وحتى لو حصلت حاجة نكون بالجهة التانية، ونركب أي شي تاني يوم. 9 صباحاً الدعم السريع دخل الدندر وجوا لحدي صفوف العربات الفيها مواطنين عايزين يطلعوا من الدندر وبدوا يعزلوا في العربات العايزنها، وفي الأول الدعامة الجوا ديل اختاروا البكاسي، بس أي بوكس واقف شالوهو، ولو في زول اعترض بياخد رصاصة في يدو أو رجلو طوالي.

 نحن جانا واحد منهم نبذنا شديد، وقال إنتو مش بتقولوا علينا جنجويد، نحن حنوريكم يعني شنو جنجويد، في اللحظة ديك أنا انتظرتو يمشي وقلت لناس بيتنا وأمي إنو إنتو أقطعوا الكوبري وأنا بنتظر مع السواق بتاع الدفار، وإذا قدرنا نقطع الكوبري بالعربية خلاص، وإذا ما قدرنا وحصل شي أنا بلحقكم، وفعلاً قدروا يقطعوا، ومشوا بالاتجاه الشرقي، بعد داك جانا واحد من الدعامة سألنا من الدفار، قلنا ليهو الدفار دا سيدو قفلو ومشى، عمّر لينا الكلاش طوالي وختاه في راسنا وقال تطلعوا المفتاح أسي دي، وبعدها طوالي السواق أداهو المفتاح وشالو ومشى ما ساق الدفار، ونحن اضطرينا نكسر الخزنة وعملنا تراب كتير في محل الجاز ونزلنا اللساتك، والوقت داك هو كان بعيد وشايفنا، نحن قايلنو مشى وما مركز معانا، وجانا راجع قال الشنط الجوا الدفار دي كلها تفضوها لي في الأرض، في واحدة من الشنط حقت بت خالتي (شنطة خطوبة) وواضح إنها جديدة، فتح الشنطة دي تحديداً وملاها رصاص كلها بدون أي سبب، وأنا عندي لابتوب شالو ختاهو في الأرض وخت رجلو في النص فصل الشاشة من الكيبورد، وكسرو على نصين وضربني بدبشك السلاح في رجلي وأصبعي اتعوق، والضفر طلع كلو، حالياً لافّي ليها شاش أكتر من أسبوع، ودا كلو متحمّلنو وهمنا كيف نقطع الكوبري لأنو ممكن يجي تاني يقتلنا.

حاولنا نقطع لكن الزحمة ما طبيعية، وناس كمية ضايعة من بعض، ومفقودين بسبب الزحمة والتدافع البحصل. كل الأسر الما لاقنّهم ديل بفقدوا بعض في الكوبري بسبب الزحمة، وجزو بقطع وجزو لا، وفي شفع بضيعوا وحاجة صعبة شديد، الناس لدرجة أنها ماشة في السكة حديد، وفي ناس بتدخل بين فتحات السكة حديد عشان تَعَدّي، والأزمة الكبيرة كانت إنو الناس رجلينها بتدخل جوا الفتحات حقت السكة حديد، وقعدنا وقت كتير بنطلّع في الناس الكبار البقعوا حاجة صعبة شديد كانت.

لمن قطعنا الكوبري لقينا إنو مافي شبكة والكهرباء قاطعة في أي مكان، وأصلاً سنار قبل يومين من الحصل دا كلو كانت برضو قاطعة، والسبب الأساسي من ضياع الناس من بعض هو عدم الكهرباء وعدم الشبكة، دا غير إنو الناس بعد تقطع بتمشي تفتش على المويه، والدندر بقت مدينة أشباح، الناس واقفين فيها وما فضل فيها أي شي، لا مويه لا أكل، الناس بس لقت بلح كانت بتوزعوا لبعض، والبلح ذاته انتهى، ودي أيام مستحيل الزول ينساها.