القوة الشرائية معناها ببساطة: قروشك دي بتجيب ليك كم سلعة وكم خدمة عند مستوى أسعار معيّن. يعني الجنيه في يدك قيمتو الحقيقية ما في الرقم المكتوب عليه، لكن في الكمية البتقدر تشتريها بيهو. لو زمان بـ 10,000 جنيه كنت بتشتري كمية سلع، وهسه نفس الـ 10,000 ما تكفي إلا نصّها، معناتو القوة الشرائية نزلت.
اقتصادياً، القوة الشرائية بتُعرَّف بأنها كمية السلع والخدمات الممكن تشتريها بوحدة نقدية واحدة، وهي مُرتبطة مُباشرة بمستوى الأسعار والتضخم، وبتقاس أثرها غالباً عبر مؤشر أسعار المستهلك (CPI).
الفرق بين القوة الشرائية والإنفاق
الإنفاق مختلف عن القوة الشرائية.
الإنفاق هو المبلغ البتصرفو فعلياً في السوق، بغضّ النظر عن قيمة العملة نفسها.
ممكن تصرف أكتر لأنو:
– عندك مناسبة.
– في موسم معين.
– في التزامات اجتماعية.
– في تحويلات إضافية.
يعني الإنفاق قرار سلوكي ومالي.
أما القوة الشرائية فهي مرتبطة بقيمة العملة ومستوى الأسعار.
في رمضان الحاصل شنو؟
رمضان موسم طلب مرتفع بطبيعته: زيادة استهلاك الغذاء، عزايم ولمّة أسرية، صدقات وزكاة، وتجهيزات قبل العيد، وأحياناً صرف رواتب قبل زمنها. وده بيسموه اقتصادياً ارتفاع الطلب الموسمي.
الفرق المهم هنا:
1. ممكن الإنفاق يزيد، والقوة الشرائية ما تتغيّر.
لو:
– راتبك 300,000 جنيه.
– والأسعار ثابتة.
– وقرّرت تصرف 200,000 بدل 150,000 عشان رمضان.
هنا السوق نِشِط، والإنفاق زاد، لكن القوة الشرائية ما تغيّرت.
2. ممكن الإنفاق يزيد، والقوة الشرائية تضعف.
لو:
– نفس الراتب، 300,000.
– الأسعار ارتفعت 20% بسبب ضغط الطلب.
عشان تجيب نفس مشتريات السنة الفاتت، حتدفع أكتر.
هنا بتصرف أكتر، لكن بتشتري نفس الكمية أو أقل.
يعني الإنفاق زاد، لكن القوة الشرائية نزلت.
ليه الناس بتحس إنو القوة الشرائية زادت في رمضان؟
لأنو:
– الحركة في السوق أكبر.
– المبيعات أعلى.
– السيولة متداولة.
– الناس بتشتري بكثافة.
الإحساس العام إنو «السوق شغال كويس»، لكن ده نشاط تجاري، ما بالضرورة تحسُّن في قيمة الجنيه.
المهم...
رمضان بنشّط السوق وبيزيد الحركة. لكن قروشك ما بتبقى أقوى إلا لو بقت تشتري ليك كمية أكبر بنفس المبلغ الزمان.
