المحافظ التمويلية في البنوك معناها إنو البنك يخصِّص مبلغ مُحدَّد من القروش لتمويل نوع مُعيَّن من النشاط الاقتصادي أو فئة معينة من الناس، ويقوم يدير القروش دي بطريقة مُنظّمة. يعني بدل البنك يِموِّل العمليات بصورة فردية ومُشتَّتة، يقوم يجمع التمويلات تحت برنامج واحد اسمو محفظة تمويلية. المحفظة دي بتكون عندها هدف واضح، مبلغ محدد، وفترة زمنية، والبنك يتابع المشاريع الممولة منها ويتأكد من سدادها وتأثيرها في الاقتصاد.
كيف بتشتغل المحفظة التمويلية؟
البنك عادة بيبدا بتحديد تلاتة حاجات أساسية:
- حجم المحفظة
يعني كم القروش المُخصَّصة للتمويل.
مثال: محفظة بقيمة 200 مليون جنيه.
- القطاع أو الفئة المستهدفة
ممكن تكون:
الزراعة، المشاريع الصغيرة، النساء، الشباب، الصناعات الصغيرة، الحرفيين.
- طريقة التمويل
حسب النظام المصرفي، التمويل ممكن يكون عبر صيغ إسلامية زي:
المُرابحة، المُشاركة، السَّلم (في الزراعة).
مثال بسيط يوضح الفكرة
لو بنك خصَّص محفظة تمويل للنساء بقيمة 500 مليون جنيه.
القروش دي ممكن تتوزع على عشرات أو مئات المشاريع الصغيرة زي: (نساء بيعملن المشاريع الغذائية، مشاريع خياطة، تجارة الملابس، إنتاج بخور أو حلويات، تصنيع صابون وزيوت العطرية ..الخ).
البنك هنا ما مَوَّل مشروع واحد كبير، لكن مَوَّل عدد كبير من المشاريع الصغيرة من نفس المحفظة.
الفرق بين التمويل العادي والمحفظة التمويلية
في التمويل العادي: البنك بيموِّل كل عميل بصورة منفصلة بدون برنامج واضح.
لكن في المحفظة التمويلية:
- التمويل يكون مُوجَّه لقطاع محدد.
- القروش بتكون مُجمَّعة تحت برنامج واحد.
- البنك بيتابع الأثر الاقتصادي للمحفظة كلها.
ليه البنوك تستخدم المحافظ التمويلية؟
المحافظ التمويلية بقت مهمة في البنوك لعدة أسباب اقتصادية:
- البنوك بتقدر تخصص جزء من مواردها لقطاعات إنتاجية معينة زي الزراعة أو الصناعة.
- بدل تمويل مشروع واحد كبير، بيتوزَّع التمويل على مشاريع كتيرة، وده بيقلل المخاطر على البنك.
- المحافظ التمويلية بتساعد في تمويل المشاريع الصغيرة والمتوسطة، وهي من أكتر القطاعات قدرة على خلق فرص العمل.
