المَلاءة المالية هي قدرة الزول أو الشركة أو المؤسّسة على إنها توفي بالتزاماتها المالية الحالية والمستقبلية، ودا بيعتمد على أصولها وراس مالها وسيولتها ومصادر تمويلها، وبيضمن استمرار النشاط وتحمُّل المخاطر والخساير المُحتَملة.
مثلاً: الشركة تكون راكزة مالياً، وعندها مقدرة توفّر القروش أو الضمانات المطلوبة وتغطي التزاماتها من غير ما تتعرّض لهزّة كبيرة في شغلها أو تدفّقاتها المالية. وأنسب مثال هو القرار المطروح لشركات استيراد الوقود في السودان: هل عندها القدرة تجيب الـ 200 كيلو دهب أو قيمتها بدون ما تتعطّل أعمالها؟ وهل عندها أصول وسيولة وتمويل يخلِّيها تفي بالتزاماتها؟ وعشان كده مرات بتسمع: «البنك اشترط إثبات المَلاءة المالية» ودا يعني البنك داير يتأكّد من إنو الشركة ما على الورق بس أو وسيط ساي، وعندها إمكانيات حقيقية تقدر تنفذ بيها النشاط المطلوب.
كيف بتتقاس؟
– حجم رأس المال: شركة رأس مالها 500 ألف دولار غير شركة رأس مالها 50 مليون دولار.
– قيمة الأصول: زي النقد في البنوك، العقارات، المخازن، الآليات، الاستثمارات. وكل ما زادت الأصول زادت الملاءة المالية.
– حجم الديون: شركة عندها أصول بـ 100 مليون وديون بـ 20 مليون أقوى من شركة عندها نفس الأصول وديون بـ 95 مليون.
– السيولة: بمعنى لو الليلة طلبوا منك 10 مليون دولار، تقدر توفرها بسرعة؟ وهنا بتظهر قوة المَلاءة المالية.
– التعامل المصرفي: لأنه البنوك عادة بتنظر لـ: القوائم المالية المدقّقة، وحركة الحسابات، والسجل الائتماني، والضمانات المتوفرة
أهميتها شنو؟
في قطاع الوقود مثلاً، المَلاءة المالية مهمّة لأنه الشحنة الواحدة ممكن تكون بعشرات الملايين من الدولارات.
فالشركة العندها ملاءة مالية عالية بتقدر:
– تفتح اعتمادات وتمويل.
– تتحمل تأخير البواخر.
– تدفع للمورّدين في الزمن المُحدّد.
– توفر الضمانات المطلوبة من الدولة أو البنوك.