اقتصاد السوق هو نظام اقتصادي بتِتْحدَّد فيهو أسعار السلع والخدمات، وحجم الإنتاج والاستثمار، عن طريق العرض والطلب وقرارات المنتجين والمستهلكين.
يعني المنتجين بقرروا ينتجوا شنو وكمية قدر شنو، والمستهلكين بحدِّدوا السلع والخدمات العايزينها، ومن خلال التفاعل بين الطرفين ديل بتتحدَّدْ الأسعار والكميات المُتْداوَلة في السوق.
كيف بشتغل اقتصاد السوق؟
لو الطلب على سلعة زاد، والكمية الموجودة منها بسيطة، سعرها غالباً بزيد. ارتفاع السعر بيِدِّي إشارة للمنتجين والمستوردين إنو السلعة دي مطلوبة، ودا بشجِّعهم على زيادة الإنتاج أو الاستيراد.
ولو المعروض بقى كبير والطلب ضعيف، السعر بنخفض، والمنتجين ممكن يِقلِّلوا الكميات أو يِحوّلوا استثماراتهم لنشاط تاني ربحيته أكبر، وقدرة المنتجين على رفع الأسعار بتزيد.
الرسم يوضح العرض و الطلب بالنسبة لسعر السلعة و الكمية
هل الحكومة ما عندها دور؟
الحكومة عندها دور أساسي حتى في اقتصاد السوق، ودورها بيشمل: وضع القوانين، وحماية المستهلك، ومنع الاحتكار، وتنظيم المنافسة، ومراقبة جودة السلع، وتحصيل الضرائب، وتوفير البنية التحتية والخدمات العامة، والدعم الموجّه، والتأمينات الاجتماعية، ووضع الحد الأدنى للأجور، وقوانين المنافسة، وضبط القطاعات الحيوية.
اقتصاد السوق والاقتصاد الموجّه والاقتصاد المًختَلَط
– في اقتصاد السوق، قرارات الإنتاج والاستثمار والأسعار بتصدر من الشركات والأفراد، وبتتأثر بالعرض والطلب والمنافسة.
– في الاقتصاد الموجّه، الحكومة بتحدِّدْ السلع المطلوب إنتاجها، وكمياتها، وأسعارها، وكيف بتتوزع، وبتكون الدولة هي المالك أو المتحكم الأساسي في وسائل الإنتاج.
– بين النموذجين ديل في مساحة واسعة اسمها الاقتصاد المُختَلَطْ، وهي الصيغة البتستخدمها معظم الدول، بدرجات متفاوتة من حرية السوق وتدخل الحكومة.
فوائد اقتصاد السوق
اقتصاد السوق بشجع على:
– الاستثمار والابتكار.
– رفع شروط المنافسة.
– تحسين الجودة.
– تقليل التكاليف.
– توجيه الموارد نحو الأنشطة والسلع المطلوبة.
– توسيع حرية اختيار مجالات العمل والإنتاج والاستهلاك والاستثمار.
مخاوف من اقتصاد السوق
– ممكن يشجع على الاحتكار.
– ممكن ينتج منه عدم توزيع للموارد بكفاءة.
– ممكن يعمل تفاوت كبير في الأجور.
– ممكن يأدي لارتفاع أسعار السلع الأساسية.
– ممكن يأثر على القطاعات الخدمية، زي الصحة والتعليم والمياه والكهرباء،
ويخليها بعيدة عن قدرة جزو كبير من المجتمع.
اقتصاد السوق في السودان
في السودان، جزء كبير من أسعار الغذاء، الوقود، النقل، الذهب، العملات والسلع المستوردة بيتحدد عبر آليات السوق، مع تدخلات حكومية متفاوتة في التسعير والاستيراد والرسوم والضرائب.
الوضع السوداني ممكن وصفه بأنو اقتصاد سوق في بيئة عالية المخاطر وضعيفة الإنتاجية، والأسعار هنا ما بتعكس العرض والطلب فقط، لكن بتعكس كمان مخاطر سعر الصرف، وعدم الاستقرار السياسي والأمني، وضعف التمويل، وارتفاع تكلفة النقل، وصعوبة الاستيراد، وتراجع الإنتاج المحلي.