كلمة KYC اختصار لعبارة Know Your Customer، ومعناها بالعربي: أعرفْ عميلَك. وهي مجموعة إجراءات البنك بعملها عشان يعرف الزول الفاتح الحساب، ويتأكّد من هويتو، عنوانو، شغلو، مصدر قروشو، والغرض البستخدم عشانو الحساب. وفي حسابات الشركات، البنك براجع طبيعة النشاط، وهيكل الملكية، والأشخاص المفوضين بإدارة الحساب، والزول الحقيقي البملك الشركة أو بستفيد من قروشها.
البنك داير يعرف شنو؟
لمن تفتح حساب أو تحدّث بياناتك، البنك ممكن يطلب منك:
– الرقم الوطني أو جواز السفر.
– صورة شخصية حديثة.
– رقم التلفون والعنوان.
– الوظيفة أو طبيعة النشاط التجاري.
– مصدر الدخل أو الأموال.
– الغرض من فتح الحساب.
– مستندات تسجيل الشركة وأسماء الملاك والمفوضين.
– معلومات عن المستفيد الحقيقي من الحساب أو الشركة.
بعد استلام المعلومات، البنك بقارنها بالمستندات الرسمية وبيحدّث ملف العميل. بعد داك بتستمر متابعة حركة الحساب عشان تكون متوافقة مع النشاط والدخل المسجلين.
ليه تحديث البيانات مهم؟
بيانات العملاء بتتغيّر مع الزمن، البطاقة ممكن تنتهي، ورقم التلفون أو العنوان يتغير، والموظف ممكن يتحوَّلْ لي صاحب عمل، والشركة ممكن يتغير مُلاكها أو الأشخاص المفوضين بي إدارة حساباتها.
عشان كدا KYC عملية مستمرة، بتبدا وَكِتْ فتح الحساب وبتتجدَّد خلال فترة التعامل مع البنك. تحديث البيانات بيساعد البنك يتأكد إنو الحساب لسه تحت سيطرة صاحبو الحقيقي، وإنو المعلومات المسجلة بتعكس وضع العميل الحالي.
الإجراء كمان بحمي العميل من انتحال الهوية، واستخدام حسابو بواسطة شخص تاني، أو تغيير بيانات التواصل من غير علمو ، وبيدّي البنك وسيلة صحيحة للتواصل معاه إذا ظهرت عملية غريبة أو محاولة دخول للحساب.
علاقتو شنو بغسل الأموال؟
غسل الأموال معناه إدخال قروش جاية من نشاط غير مشروع لي النظام المالي، وتحريكها بين حسابات أو شركات مختلفة عشان يصعب الوصول لي مصدرها، وبعد داك بتظهر كأنها قروش ناتجة من تجارة أو استثمار مشروع.
KYC بيمثل خط الدفاع الأول، لأنو بربط كل حساب بزول معروف، ونشاط واضح، ومصدر دخل ممكن التحقق منو، لمن تكون بيانات العميل ناقصة أو قديمة، بتكون قدرة البنك على فهم حركة القروش ومتابعتها أضعف.
كيف بساعد في كشف غسل الأموال؟
أول خطوة هي التأكد من الهوية الحقيقية، البنك بيتحقق من إنو الزول الموجود هو نفسو صاحب المستندات، ودا بقلل استخدام الأسماء الوهمية أو الهويات المسروقة في فتح الحسابات وتحريك الأموال.
الخطوة التانية هي معرفة مصدر القروش، البنك بسأل العميل عن وظيفتو، دخلو، نشاطو التجاري، والغرض من الحساب.
بعد داك بقارن المعلومات دي بحركة الأموال الفعلية.
مثلاً، إذا كان العميل موظفاً ودخلو الشهري 500 ألف جنيه، وبعد فترة بدأ حسابو يستقبل تحويلات بعشرات الملايين بصورة متكررة، العملية دي بتحتاج تفسير، فالبنك ممكن يطلب عقود، فواتير، مستندات بيع أو أي أوراق توضح مصدر المبالغ. ظهور مؤشرات اشتباه قوية ممكن يقود لي فحص إضافي ورفع بلاغ عن معاملة مشبوهة للجهة المختصة.
الخطوة التالتة هي معرفة المستفيد الحقيقي، أحياناً الشركة بتكون مسجلة باسم زول، لكن المسيطر عليها والمستفيد من قروشها زول تاني. KYC بساعد البنك يعرف الزول الحقيقي الواقف خلف الشركة أو العملية، وده البسمّوه المستفيد الحقيقي.
تصنيف العملاء حسب المخاطر
البنك بصنّف العملاء حسب درجة المخاطر: منخفضة، متوسطة أو عالية. التصنيف بيعتمد على طبيعة النشاط، حجم المعاملات، الدول والجهات التي يتعامل معها العميل، مصدر الأموال، وهيكل ملكية الشركة.
العميل المصنّف عالي المخاطر بخضع لإجراءات تَحقُّق أوسع، وبيُطلب منو مستندات إضافية، وبتكون حركة حسابو تحت متابعة أدقّ، التصنيف العالي معناه طبيعة النشاط أو المعاملات محتاجة عناية أكبر.
المراقبة المستمرة
البنك بقارن حركة الحساب بالمعلومات المسجّلة في ملف العميل. ومن الحركات الممكن تثير الانتباه:
– إيداعات كبيرة مقارنة بدخل العميل.
– استقبال مبلغ وتحويلو أو سحبو بسرعة.
– تقسيم مبلغ كبير لي تحويلات صغيرة.
– تحريك القروش بين حسابات كثيرة من غير غرض اقتصادي واضح.
– استخدام حساب شخصي في معاملات تجارية ضخمة.
– التحويل المتكرر لي جهات أو مناطق مرتفعة المخاطر.
– زيادة مفاجئة في نشاط الحساب من غير تفسير واضح.
ظهور واحدة من العلامات دي بفتح باب المراجعة وطلب المعلومات.
والبنك بجمع المؤشرات ويفحص طبيعة العملية والظروف المحيطة بيها قبل اتخاذ الإجراء المناسب.