التضخّم المستورد هو ارتفاع الأسعار جُوا البلد نتيجة زيادة تكلفة السلع والخدمات البتجي من برّا. يعني لما القمح أو الوقود أو الدواء سعرو يزيد عند المُورِّد، أو تزيد تكلفة شحنو وتأمينو، الزيادة دي بتدخل في تكلفة الاستيراد، وبتصل للأسعار البيدفعها المواطن، وممكن نفس الشيء يحصل لو الجنيه فقد جزو من قيمتو، لأنو شراء السلعة ذاتا من برا البلد بقى محتاج جنيهات أكتر، حتى لو سعرها بالدولار ثابت.
الغلاء الجاي من برّا
لما تمشي الدكان تلقى سعر اللبن زاد، وتمشي الفُرُن تلقى القروش البتجيب ليك ستة عيشات بقت تجيب أربعة، وتسأل مختصين عن السبب، يقولوا ليك (الأسعار برّا زادت)، طيب، الزيادة الحصلت في بلد تانية وصلت جيبك هنا كيف؟ دي الحكاية البشرحها مصطلح (التضخّم المستورد)، ارتفاع تكلفة السلع البنشترِيها من برّا البلد، وانتقال الزيادة دي للأسعار جوا البلد.
من سعر القمح لسعر الرغيفة
الحكاية بتبدأ من السلعة ذاتا، لو سعر القمح عالمياً ارتفع بسبب ضعف المحصول، أو زيادة الطلب، أو تعطّل الإمدادات، هنا المستورد بحتاج يدفع دولارات أكتر عشان يشتري نفس الكمية، وممكن سعر القمح يكون ثابت، لكن سعر الشحن والتأمين بيرتفعوا بسبب اضطراب الملاحة أو زيادة تكلفة الوقود. في الحالتين، القمح بوصل الميناء بتكلفة أعلى، والزيادة بتتحرك معاه لحدي المطحنة، ومنها للفُرُن، لحد ما تصل العيشة البتشتريها.
لما الجنيه يفقد قيمته
وفي باب تاني بزيد تكلفة الواردات: «سعر الصرف». يعني المُستورِد ببيع بالجنيه، لكن عشان يشتري من برّا محتاج دولار أو عملة أجنبية تانية، لو الجنيه فقد جزو من قيمته، المُستورِد بحتاج جنيهات أكتر عشان يشتري الدولارات ذاتا، حتى لو المورِّد الخارجي ما غيّر سعرو، هنا ضغط الأسعار جاي من انخفاض قيمة العملة المحلية، وبنتقل للسوق عبر السلع المستوردة، عشان كدا، مهم نعرف: هل الزيادة حصلت في سعر السلعة برّا؟ ولا في سعر العملة هنا؟ ولا الاتنين مع بعض؟
الزيادة بالحساب
فرضاً كدا، بضاعة قيمتها 100 دولار، والدولار بألف جنيه، بتكون تكلفتها 100 ألف جنيه قبل الشحن والرسوم، لو سعرها برّا زاد لي 120 دولار، والدولار بقى بي ألف وخمسمائة جنيه، تكلفتها بتصل 180 ألف جنيه. يعني زيادة 80% بالجنيه، ناتجة من ارتفاع السعر الخارجي وانخفاض قيمة العملة مع بعض، والنسبة دي حقت تكلفة شراء البضاعة قبل الشحن والتأمين والرسوم. وسعر البيع النهائي بتدخل فيه التكاليف دي مع النقل الداخلي وهوامش البيع.
طيب، المحلي بيغلَى ليه؟
لأنو الإنتاج المحلي ذاتو ممكن يعتمد على حاجات مستوردة، المُزارع بستخدم سماد ومبيدات وقطع غيار، والمصنع بحتاج مواد خام وعبوات وآلات، والشاحنة بتستهلك وقود وإطارات، لما المدخلات دي تغلَى، تكلفة الزراعة والتصنيع والترحيل بترتفع، وجزء منها بنتقل لي سعر المنتج المحلي، عشان كدا، عبارة (صناعة محلية) ما معناها إنو تكلفة السلعة كلها منفصلة عن الخارج.
الزيادة بتصل جيبك كيف؟
حجم الزيادة البتصل للمواطن بتحدده ظروف السوق، ممكن التاجر يتحمَّل جزو منها بتخفيض ربحه، وممكن يمررها للمشتري، أو المصنع يقلل حجم العبوة عشان يحافظ على السعر المكتوب، والانتقال ممكن يتأخر لحدي ما المخزون القديم يخلص وتتجدد المشتريات بي تكلفة أعلى، عشان كدا، ارتفاع تكلفة الاستيراد بنسبة معينة ما معناهو إنو كل أسعار السوق حتزيد بنفس النسبة وفي نفس اليوم. وكل ما زاد اعتماد الاستهلاك والإنتاج على الواردات، ممكن يكون أثر الزيادات الخارجية وسعر الصرف أوسع، بحسب وزن السلع المتأثرة في مصروفات الناس.
نمسك أول الخيط من وين؟
عشان نفهم الغلا الحاصل قدامنا، بنحتاج نفكّك السعر، زاد كم عند المورِّد؟ والشحن زاد كم؟ وشنو الحصل للجنيه؟ وبعدها نراجع تكاليف النقل والرسوم داخل البلد، وكده بيوضح مصدر الضغط، وبتحدَّد وين ممكن يتخفَّف، ومع اعتماد الإنتاج المحلي على مدخلات أجنبية، بتظهر أهمية توفير بدايل مجدية ليها، والمواطن البشتري عيش بالجنيه ممكن يكون بيدفع، ضمن السعر، أثر محصول اتراجع بعيد، وباخرة اتأخرت، وعملة محلية ضعفت.
