أنا حاتكلم عن وضع غرفة الطوارئ مؤخراً، أو وممكن نقول من بداية 2024، بالذات مع زيادة الناس في المدينة، وكيف الغرفة بتحاول تستجيب لموجات النزوح اليومية. الغرف في كل الولايات وفي كسلا تحديداً معتمدة على الجهد الشعبي والذاتي، وكلنا كونّا الغرف، لأنو كنا شايفين إنو في ضرورة مهمة لي إنو نتنظّم ونشتغل ونوفر مساحة وأكل، ولو وجبة واحدة للناس. 

كنا في تحدي كبير شديد في أول يوم بعد سقوط مدني، لأنو وقتها ولاية كسلا، وتحديداً محلية كسلا، أعلنت إنو كل المراكز ودور الإيواء إتملت تماماً بالناس، ومافي مساحة لاستقبال زول أو تقديم أي نوع من المساعدة، وبعد الدعم السريع دخل سنجة الوضع بقى أصعب والناس ماشة زايدة، وكسلا بقت وجهة لناس كتار ما حصل زاروها ولا عندهم أهل فيها، لكن من أقرب الولايات بالنسبة ليهم، وشوية بعيدة من مساحات الحرب أو مناطق الحرب زي وسط السودان الجزيرة وسنار والنيل الأزرق والدندر، وكل النازحين الجونا بحكوا عن إنو دا نزوحهم الرابع أو الخامس، تحديداً الناس الساكنين الخرطوم. الوقت داك كسلا ملانة وأي أسرة جاية بنكلمهم إنو المراكز إتملت، وانتو حتقعدوا في ريفي كسلا، وأكيد هم ما عندهم مانع رغم صعوبة الوضع والحياة، لكن أقلاها منطقة آمنة ما فيها رصاص ودانات واشتباكات. 

ورغم الصعوبات دي، نحن استفدنا جداً من حملات المناشدة الإتعملت والنداءات العملناها في كسلا، وجزو كبير من ناس كسلا إتجاوب معانا وساهم بالعندو، بالذات الناس البرا السودان والقاعدين برضو بالعندهم قدروا يساهموا ويساعدونا في إننا نعمل مطبخ مركزي تحديداً للنازحين من سنار وسنجة، كآخر ناس جوا كسلا وعددهم كبير لأنو في جزء منهم أصلا كانوا نزحوا من مدني وقرى الجزيرة ومشوا سنار وسنجة، وقالوا لمن الوضع يهدا نرجع الجزيرة والخرطوم. 

 بعد عملنا المطبخ المركزي عملنا مطابخ فرعية في مراكز الاستقبال، وأول مطبخ فرعي إتعمل كان في مركز استقبال وزارة الزراعة، بعد داك الأسر اترحلت من الوزارة لمركز نزلة العمدة، وثبتنا ليهم مطبخ هناك، وكان في مشكلة إنو كيف نحن كلنا وكل المتطوعين نصل نزلة العمدة لأنها في ريفي غرب كسلا، يعني خارج المحلية، فقلنا أحسن نثبت المطبخ هناك، ويكون بإشراف وإدارة الأسر القاعدة هناك، وحقيقي دي واحدة من أكبر المشاكل، إنو كيف المتطوعين يقدروا يمشوا المراكز البعيدة، ويشتغلوا فيها، ونحن ما عندنا إمكانيات للآن، ما عندنا ترحيل، واعتمادنا كله على التبرعات والمجهودات الشعبية. 

الوضع حالياً مع الخريف والأمطار الكتيرة كعب، وفي مراكز إيواء ومراكز استقبال إتملت تماماً بالمويه، والوضع الصحي انهار تماماً لأنو الحمامات المؤقتة إتعملت عمقها 2 متر تقريباً بس، ومع موية المطرة حصل اختلاط، وأسي الأمراض بدت تنتشر، الالتهابات والإسهالات، الكوليرا، الأمراض الجلدية والحميات، والوضع الصحي كارثي بمعنى الكلمة، الأسر طلعت وانتشرت في الشوارع، والحركة بقت صعبة لأنو في أطفال وناس كبار ما ممكن يتحركوا في الشوارع الغرقانة مويه دي، وحتى نحن حركتنا صعبة، لكن استفدنا من التوزيع الجغرافي للمتطوعين والناس القاعدة في المناطق دي، وبرضو رفعنا مناشدة وحوجتنا للمتطوعين والمساعدة في صفحتنا في فيسبوك، وفي كل المنصات، والحمد لله في ناس جاتنا بروحها، وفي ناس إتبرعت بعرباتا عشان تنقل الناس والأكل وكل حاجات المطابخ، وفي ناس إتبرعت بعربات شفط المويه، وقدرنا الحمد لله اتخطينا تحدي الحركة ونقل الناس والحاجات من الحتات الإتملت مويه لشوارع فاضية لحدي ما الأوضاع تتحسن. 

واحدة من أكبر الحاجات الشاغلة بال كل المتطوعين وأفراد غرف الطوارئ إنو الولاية حتفتح المدارس اللي هي حالياً عبارة عن سكن للناس كلها، لأنو ما عندهم مكان، وللآن نحن ما عارفين كيف ممكن نتعامل مع القرار دا لمن يتنفذ، ولا عارفين حلولنا البديلة حتكون شنو. في نفس الوقت دا في أسر حالياً هي في الشوارع، وما عندها مكان بسبب الزحمة، والحاجة دي بتزيد في صعوبة الوضع الإنساني في كل الولاية، وبسببها ما حنكون عارفين إنو مفروض نرحّل الأسر القاعدة في مراكز الإيواء المفروض تفضى حسب وزارة التربية والتعليم، ولا نرحل الناس الفي الشارع للحتات الحتتعمل بديل للمراكز.