قرية سركمتو بتقع في شمال السودان على بعد حوالي 30 كم من مدينة عبري، وبالضبط جنوب وادي حلفا، وإدارياً تابعة لمجلس ريفي وادي حلفا، نحن أصلاً من سركمتو، أهلنا كلهم مستقرين فيها ما عدا كم أسرة، كنا قاعدين في الخرطوم بسبب الوظائف والقراية وغيرها من الأسباب البتخلي الناس تعيش في الخرطوم.  

بخصوص شبكات الاتصال والإنترنت، حالياً زين بس المستقرة، وطول اليوم، مع أنها بتكون ضعيفة جداً، وإلا تمشي حتات عالية أو قريب من الأبراج حقت الاتصالات، لكن موجودة وممكن تعمل بيها إنترنت ومكالمات، وشبكة سوداني من أكتر الشبكات البستخدموها الناس، وشغالة، لكن عندها ساعات محددة من الصباح لحدي 7 مسا، بتقطع تاني ما بتجي إلا بكرة الصباح، والناس اتأقلمت على الموضوع دا. أما شبكة إم تي إن خارج الخدمة تماماً من بداية الحرب قبل كارثة السيول والفيضانات الحاصلة دي كلها، والقرية بتكون معزولة عن العالم الخارجي بالكامل تماماً بالمسا ما عدا الناس العندهم شريحة زين فقط. 

من بداية شهر أغسطس السيول والأمطار جات كتيرة شديد لدرجة إنو ما فضل بيت واقف، فقدنا أي حاجة، أثاثات وأواني وقروش وممتلكات وكل حاجة، وفي أحياء اتمسحت بالكامل، نحن شوية وضعنا أخف لأنو ما كل البيوت وقعت، لكن بنسبة أكتر من 80%، وما فضلت حاجة، وبسبب السيول دي الكهرباء فصلوها كلها لأنو الحيط لينة أو مبلولة بالمويه، والأسلاك الكهربائية كلها واقعة في الأرض، والحاجة دي ممكن تأثر على الأطفال والناس المتحركين عموماً، وبالنسبة للمويه كل الخطوط اتعطلت بسبب السيل، وجزو كبير منها اتكسر تماماً، لكن حالياً الوضع أحسن حصلت معالجات في أسلاك وأعمدة الكهربا، يعني في حتات بعد الأرض نشفت حصلت فيها صيانة وكهربتها رجعت والمويه برضو شغالين فيها، والناس معتمدة على صهريجين كبار كل الحلة بتشرب منهم. 

التموين بجينا من نفس الولاية، لكن من مدن تانية ونحن تابعين لمحلية حلفا، أغلب الأكل بجي من هناك أو مرات بجينا من وحدة عبري الإدارية، وفي حاجات بسيطة بتجي من دنقلا، كل التموين بجي من داخل الولاية، في القرية في دكان واحد كبير، كل الناس بتشتري منو، وأول أيام السيل البيع وقف، وما كان في محل الناس تجيب منو الاحتياجات حقتها، والناس اعتمدت على الإغاثات الجات من عبري، تحديداً الناس العندهم بكاسي قدروا يدخّلوا تموين وأكل للقرية، وبعد الواطة نشفت التموين بقى ثابت بجي من عبري، ومافي زيادات كبيرة في الأسعار، لأنو حتى سيد الدكان البجيب التموين وببيعه لينا نحن أهله، ومافي زول غريب أصلاً عشان يكون في استغلال، والحمد لله باع لينا الحاجات بنفس الأسعار القديمة، كيلو السكر بـ 3 ألف جنيه و7 عيشات بألف جنيه، ورطل الزيت بـ 3 ألف. 

ما كان عندنا مراكز لجوء أو دور للإيواء طوال الفترة الفاتت، لحدي ما جات السيول والأمطار دي، واضطرينا نستخدم المدرسة بتاعت القرية، والمركز الصحي والمسجد، وبقوا مكان للنازحين الكانوا قاعدين مع أهلهم في البيوت، وبعد فترة اتبرعت منظمة صدقات وأدت أي بيت خيمة تتعمل قدام البيت ويسكنوا فيها الناس لحدي ما يقدروا يبنوا الغرف والحمامات تاني من الأول، في مناطق اتمسحت تماماً، دي ناسها قاعدين مع بعض وعملوا تجمعات قاعدين كلهم جنب بعض، وعايشين كدا لحدي ما يقدروا يرجعوا الأحياء حقتهم ويبنوها من الأول زي ما كانت، زي منطقة اسمها شفان، وتيل، ومنطقة دشنة، دي مناطق الناس الاتضرروا فيها عملوا تجمعات. 

الوضع الصحي معتمدين فيهو بالكامل على الدعم الخارجي، سواء كان من الأهل خارج السودان والخيرين أو تدخل المنظمات، والقرية فيها مركز صحي واحد خدماته متواضعة شديد، وكان عندنا نقص في أمصال العقارب، لكن إتوفرت الفترة دي بكميات ما كبيرة، لكن حاجة بتغطي فرقة الطوارئ التبرعات جات من حلفا ودنقلا.  

بالنسبة للمستشفيات إذا في حاجة بتستدعي إنو ينقلوا الحالات لمستشفى، الناس بتمشي أقرب مكان ليهم وهو مستشفى عبري، مسافتو نص ساعة من القرية، وإذا الحالة خطرة شديد إلا الناس تمشي مستشفى حلفا حوالي ساعتين أو ساعتين ونص من سركمتو، والحمد لله إنو في الكارثة دي ما حصلت حالات لدرجة الناس تسافر لحدي حلفا، وأغلب المشاكل الصحية كانت لدغات عقارب، هبوط أو ارتفاع في السكر والضغط، ومشاكل بتتحل في المركز الصحي، وفي قوافل طبية جات من القرى القريبة فيها دكاترة وأخصائيين، وأشرفوا على الحالات الخطيرة في الحلة. 

المواصلات وقفت أيام السيل، لأنو الشوارع كلها مويه، وفي خطر كبير على الناس في الحركة، وأصلا مستحيل العربية تتحرك في المويه والطين. الناس استخدمت مراكب البحر والرَّفَّاسات عشان يتنقلوا بيها جوا الحلة لحدي ما الأرض، نشفت تماماً وحالياً الحياة بدت ترجع ووسيلة المواصلات الرسمية التكاتك سعرها أرخص وأسرع شغالين بيها من جوا الحلة لحدي الزلط الرئيسي، ومن هناك ممكن تواصل المشوار بمواصلات تانية.  

في شكل للدولة، لأنو عندنا محلية شغالة وحكومة ولاية، ساعدت في موضوع السيول دا، معاهم المنظمات وأبناء القرية بالخارج، التلاتة ديل مع بعض هم سبب في إنقاذ الناس وتقديم المساعدات الفترة الفاتت.