أنا موجود في معسكر كلمة، وزي ما معروف المعسكر مافيهو خدمات. الكهربا والمويه كانت مسؤولة منها منظمة كير، لكن مع بداية الحرب كل المنظمة غادرت السودان، والدعم البقدموه وقف حالياً، والناس بقت تجيب من آبار بعيدة، وبتنقل المويه بالفنطاس، وبتتباع في المعسكر، وحالياً سعر جوز المويه بـ 200 جنيه، والفنطاس كامل  سعرو 6 ألف جنيه.  

التموين بجينا من خارج السودان، وكل الأسواق هنا أو في نيالا المدينة معتمدة على البضاعة البتجي من جنوب السودان، وقبل الحرب في شمال دارفور كان بتجينا بضاعة من ليبيا عن طريق المالحة – الفاشر – لبدو – بليل، بعد داك بتصلنا هنا، لكن الطريق دا حالياً قفل، وأسي بسبب الأمطار الكتيرة العربات بقت واقفة تماماً، وما قادرة تتحرك. وبسبب الحاجة دي المواد التموينية أسعارها ممكن أقول بأقل وصف مني إنها ارتفعت بنسبة 200٪، مثلاً السكر الرطل كان بألف جنيه قبل ست شهور، أسي حالياً بألفين ونص جنيه، والرز كان بألفين أسي حالياً سعرو 5 ألف، وشوال الدقيق 25 كيلو كان بـ 30 ألف وأسي بـ 950 – 100 ألف، وملوة الدخن والذرة سعرهم بقى 12 ألف، وقبل ستة شهور كانوا بـ 5 ألف. 

الحرب البدت في 15 أبريل عطلت الطرق، وأثرت في الشركات الكانت بتبيع وتستورد التموين، غير مشاكل الخريف، عشان كدا الأسعار اتضاعفت وزادت شديد خلت الناس كلهم عايشين في حيرة، حالياً معظم الأسر وقفت العصيدة كوجبة بتتأكل في أي بيت بسبب أنها بقت مكلفة، وعايشين على المكرونة والشعرية والناس بتاكلهم مرة واحدة في اليوم، وفي ناس ما عندها مقدرة على المكرونة والشعرية بدقوا (الكريب)، هو قش بقوم مع الخريف بعملوا منو مديدة، الأكل هنا حاجة صعبة وبِنْعَكِسْ طوالي في شكل حالات سوء التغذية المنتشرة بكميات كبيرة بالذات عند الأطفال. 

الحركة والتجوال جوا المعسكر عادية، ومافي تدخلات حكومية أو أي قيود ومن قبل الحرب الأخيرة، في تنسيق مع الحكومة والقوات، ودا مخلي في هامش حرية في الحركة والشغل جوا المعسكر، لكن برا المعسكر أي شي اتلخبط، والأسر بقت محاصرة بين السكة حديد أقصى جنوب المعسكر وبين الوادي أقصى الشمال، الناس بقت عايشة بين المحورين ديل بس، ولو طلعت برا الحتة دي لو ما مُتَّ ممكن تتعرض لأذى جسدي أو نهب، والنسوان ممكن يتم اغتصابن والرجال بخطفوهم وبطلبوا فدية من أهلهم عشان يفرج عنهم، وحصلت الحاجة دي لناس كتار طلعوا من المعسكر عشان يجيبوا تموين أو يفتشوا شغل، وكل الانتهاكات دي بتحصل من الدعم السريع لأنهم مسيطرين على كل جنوب دارفور. 

جُوَّا المعسكر الناس بتتحرك بالكارو، وأقرب مواصلات داخلية هي الركشات وتكاتك من المعسكر لحدي منطقة بليل، سعرها ألف جنيه، ومن المعسكر لنيالا في باصات كان سعرها ألف وأسي ما في باصات  طبعاً بسبب الحرب، بس في تكاتك السعر 3 ألف ونص. 

بخصوص الوضع الصحي والمستشفيات في مركزين، واحد منهم تابع لأطباء بلا حدود بقدموا حالياً في الخدمات، وكان في مركز (إم اي سي)، لكن بسبب إنو مافي ممرات آمنة ومشاكل لوجستية، غادروا المعسكر وفي مكانهم أسي شغالين أطباء بلا حدود. 

الوضع الأمني جوا المعسكر هادي، لكن برا المعسكر في نهب وضرب، وهم عايشين على نهب الناس، وبالذات بعد قصف الطيران في نيالا هم بنتشروا في الشوارع، وبمارسوا في الناس عنف شديد، وبدخلوا بيوت الناس وبشيلوا منهم أي شي بالقوة، وطبعاً بحكم أنهم مسيطرين على الولاية كلها، بقدروا يعملوا أي حاجة، ومافي زول بنقذك حتى هم مقسمين في جزو دعم سريع رسمي ولابسين الزي، وفي جزو منهم عبارة عن متفلتين لافين في الشوارع، وبنهبوا الناس وبضربوهم، وبسبب المضايقات دي مافي زول بطلع من المعسكر، وهم أصلاً بتعاملوا مع المعسكر بمفهوم إنو المنطقة الإستقبلت ناس الجيش بعد سقوط الفرقة  16 مشاة، وإنو المعسكر دا أي زول فيهو جياشي، وممكن يرموا فيك أي تهمة عشان تشتبك معاهم وتعترض بعداك يعتقلوك طوالي وبطلبوا فدية وبتكون مبلغ كبير جداً. 

وحالياً الدعم السريع عمل حاجة اسمها السلطة المدنية، باعتبار إنهم مسيطرين على المنطقة وبشكلوا الحاكم الأساسي فيها، والرئيس بتاع السلطة المدنية زي الوالي كدا في الصلاحيات وفي سلطات تنفيذية، واتعملت الحاجة دي حسب كلامهم عشان ينجح الموسم الزراعي وهم مسؤولين من حماية مناطق الزراعة.