نحن في الفاشر شمال المستشفى الجنوبي، حينا اسمه حي برنجية ولحدي قبل فترة قريبة الحي كلو كان جيش، وفي أولاد من الحلة ذاتهم تابعين للجيش، لكن بسبب المعارك والتغييرات الحاصلة الحي هسي بقى فيهو دعامة، والمستشفى الجنوبي كان فيهو قيادة للجيش، هسي فاضي، والدعامة بتسللوا يومياً لحدي السوق الكبير وبرجعوا من كل المحاور.

حالياً أحياء برنجية، التيمانات، الكفاح وجزو من حي العظمة مناطق ما آمنة أبدا وفيها دعامة، وطبعاً الكهرباء قاطعة ليها ١٧ شهر، وشبكات الاتصالات في كل الشرائح قاطعة ليها ٥ شهور، ما حصل جات، والحاجة دي مؤثرة علينا جداً، لا قادرين نتواصل لا قادرين نستخدم القروش الفي بنكك، لا قادرين نعرف الحاصل حولنا ولا عارفين أخبار السودان شنو، والفاشر ذاتها ما عارفين شنو حاصل جنبنا، عشان ناخد حذرنا أو نكون متطمنين لو في أخبار كويسة، معزولين تماماً عن العالم ومافي زول عارف البحصل جوا الفاشر من تدوين وحرب وكلو.

الوضع الصحي من زمان كعب، وهسي زاد الطين بلة زي ما بقول المثل، حالياً كل المستشفيات خارج الخدمة تماماً، عدا اتنين ولا حتى طوارئ ما شغالين، ولو جيتهم عندك جرحة ساي برضو مافي خدمات يقدموها ليك، في مستشفيين شغالين المستشفى السعودي والعسكري وديل حالياً بسبب الحرب كل خدماتهم للجنود بس والعساكر المصابين في الحرب الشغالة دي، والولادة القيصرية سعرها ما بين 400-500 ألف جنيه سوداني، ومافي أي زول هنا عندو القروش دي، ما معروف النسوان ديل حيحصل عليهم شنو.

عندنا أزمة كاش مبالغ فيها، يعني الزول حتى بقروشو في التلفون ما بقدر ياكل ويشرب ويتحرك، لأنو مافي كاش، لدرجة إنو الناس بقت عادي ما تاكل تلاتة أيام، والسوق فيهو حاجات يعني في تموين وسلع، لكن مافي قروش، الناس تتعامل بيها والدفع ببنكك غالي شديد، الحاجة لو بألف ممكن تشتريها بقريب 3 ألف لو ما معاك كاش.

عدد الإصابات من بداية الحرب لحدي هسي فاتت أربعة ألف إصابة حسب السجلوهم المتطوعين في المدينة، وفي غيرهم كتير، زي الناس البمرقوا يتعالجوا برا، والوفيات برضو كتيرة شديد، في جزو منهم معروفين وعندهم إحصائيات، وجزو منهم بدفنوهم في مقابر جماعية من دون يصلوا المستشفى أصلاً، وفي ناس بموتوا بسبب الحرب، وبعرفوهم الجيران بعد كم يوم وبدفنوهم، بس عشان كدا الأرقام كبيرة وما مضبوطة.

الوضع صعب شديد أسي، عدد كبير من الناس طلعت من بيوتهم ومن مراكز الإيواء ومن أي حتة بسبب التدوين البحصل والقصف، وطلعوا بالمخرج الوحيد، وهو محلية دار السلام، حالياً للأسف محلية دار السلام الدعم السريع مسيطر عليها تماماً، وهي معبر السلع والتموين والكاش وكل الحاجات الفيها فايدة مالية، وفارضين رسوم عالية زي ضرائب كدا على التجار والعربات المارة وحتى الأطفال الصغار الببيعوا حاجات في الأرض بشيلوا منهم قروش، أي عربات شايلة سلع ماشة اتجاه الدبة أو غيرو، بوقفوهم وبحققوا معاهم وفي عربات حجزوها، وقبضوا الناس لحدي ما يدفعوا قروش كتيرة بعد داك بخلوهم يمشوا، وحالياً أي زول مسافر من الفاشر من دار السلام تحديداً بدفع للدعامة ٥ ألف غير حق التذكرة والسواق بتاع العربية بدفع ٣٠٠ ألف ساي من دون أي توضيح لي إنو القروش دي شنو وليه بشيلوها مننا. 

 وسمعت ناس بتقول العمدة بتاع دار السلام عندو نصيب من القروش دي، بيقولوا كدا وماف حاجة مؤكدة، لكن ما بستبعد في الحرب دي أي شي بقى عادي، والناس حاسة بالخطر شديد، مافي زول مطمّن أبداً، هسي الرعاة وأي زول عندو بهائم بدا يدخل مواشيهو في مزارع الناس، وفي مشاكل بدت تظهر لأنو أصلاً في مشاكل قديمة بين الرعاة والمزارعين، وكل كم أسبوع في قتل بحصل بيناتهم، الأسبوع الفات في مزارعين اتنين قتلوهم وحصلت مشاكل كبيرة، لكن الإدارة الأهلية اتدخلت والموضوع اتحل وفي قروش اتدفعت غرامة.

حالياً كل الناس بتنزح لحتات جديدة، بسبب إنو الدعامة مُضايقين الناس في أي مكان، في أكلهم وشرابهم وحتى حركتهم من مكان لمكان، والحال صعب شديد، الناس تعبت وما فضل ليهم شي، لا قروش لا أكل لا علاجات وعايشين على الله بس.