نحن أصلاً من الحصاحيصا، وبيتنا الكبير هناك، وقاعدين طوال فترة الحرب دي متعايشين مع الحاصل، ومما الدعم السريع دخل مدني نحن ما شفنا خير، وجوا قعدوا معانا في الأحياء والبيوت، وما بتقدر ترفضهم أو تقول ليهم أطلعوا من بيوت الناس، ولا حتى كلام في الشارع ما ممكن تتكلم، بالذات نحن بيتنا على الزلط، وما قدّرنا نقعد كتير في الحصاحيصا، مشينا منطقة اسمها السلفاب، وبعدها تاني نزحنا لي (أب جلفا) ومنها هسي متشردين بسبب آخر ضرب حصل في تمبول شمال حلتنا والحصل في العزازة وبانت والعوايدة، وكلهم بقعوا غرب حلتنا، ونحن حلتنا الأقل ضرراُ من الحصل دا، في حتات الناس بنلاقيهم في الشارع بقولوا مرقوا، وماعارفين الحي منو والمات منو، وفي ناس قدروا يدفنوا ناسهم، وفي ناس الدعم السريع قتل أهلهم قدامهم وقالوا ليهم مافي دفن، أطلعوا من هنا شوفوا كيكل وين، أمشوا المكان القاعد فيهو.

نحن في حلتنا قبل نطلع، الدعامة أول شي شالوا أي ستارلينك قاعد في المنطقة، ختوهو معاهم في التاتشرات، وبدوا ينهبوا الدكاكين، بدوا أول شي بالدقيق والسكر، ما خلوا حاجة الناس تاكلها أو تشيلها معاها، وما بشيلوا الشوالات، هم بشغّلوا رجال الحلة يرفعوا حاجات الدكاكين في التاتشرات من دون كلام. قبل موضوع كيكل دا الحياة كانت طبيعية جداً، وحتى التعايش مع الدعامة كان عادي الزول بتفاداهم وما بمشي جنبهم وخلاص.

من يوم الاتنين الفات سمعنا الضرب بتاع تمبول، والأخبار وصلتنا لأنو الوقت داك الاستارلينك متوفر وقريب من البيوت قررنا نطلع، لأنو خُفْتَ على بناتي الصغار، دا غير إنو زوجتي ومعاها واحدة من البنات عندهم سكري، ونحن طالعين للمجهول والأدوية زاتو عشان تتحفظ محتاجة تلاجة وحكاية صعبة جداً، والأصعب في الموضوع دا الحركة والمشي مسافات طويلة، مشينا بالحواشات حقت العيش والحسكنيت، وزوجتي دي هبّطت تلاتة مرات في الشارع بسبب العطش والتعب، دا غير إنو طلعنا مخلوعين مافي زول رتب للطلعة دي ولا خطط ليها، وماشين من 9 ونص الصباح وصلنا أم عكش صلاة العشاء، ودا المحل الفيهو الدفار.

 طبعا الاستغلال بدا طوالي، بتاع عربية في حلتنا قال لو ما الناس أدتو 5 مليار جنيه سوداني هو مفتاح عربيتو ما بحرّكه، بالإضافة لأنو ندفع حق الجاز برانا، ودي حاجة مستحيلة، في الآخر نحن وكم أسرة تانية اتفقنا مع بتاع دفار أخد مننا مليار ونص ووصلنا لحدي القضارف، وكان واقف في مكان بعيد، لأنو لو جاء جوا الحلة كان شالوا منو العربية اتحركنا يوم كامل ماشين في الشارع ما معانا غير باقات مويه، وخلصت في نص اليوم ومعانا بلح كل ما زول يهبط بياكل ليهو كم بلحة، ونواصل حاجة خيالية تحسها أو كذب كذب كدا، وصلنا العربية الكبيرة واتحركنا، وبرضو الطريق كان صعب شديد لأنو ما بتمشي بالشوارع المعروفة، نحن الرجال قاعدين فوق في راس الدفار والنسوان تحت في الأرضية من دون مساند أو أي شي، في منهم حبوبات كبار وفي حوامل وفي طفلات ووضع ما ممكن زول يتخيلو أبداً.

الأسبوع الفات كلو الناس متحركة بالدفارات، من القضارف بجوا لحدي الجزيرة، والتنسيق عن طريق المغتربين من أولاد المنطقة إيجار الدفار أو الجرار من مليار ونص لحدي 2 مليار ونص بوصلوا ليك ناسك لحدي القضارف، الناس البرا السودان أي زول أجّر دفار لأسرتو، لكن طبعاً في ناس ما عندهم زول يأجر ليهم، فبتلقى الدفار ملان شديد لدرجة الناس ممكن تقع، لكن الحاجة دي ساعدت إنو عدد كبير من الناس يطلعوا، لكن لسه والله في ناس كتيرة ما طلعت ولا عندها حق الطلوع، والمحطة البتلموا فيها الناس قرية قدام أبوجلفا اسمها الحدبة، وقرية اسمها ود الامين، ومكان اسمو أم عكش، دي الحتات البتتحرك منها العربات الكبيرة، وزاتها محتاجة جهد كبير عشان تصلها، وزي ما قلت ليك تمينا يوم كامل عشان نصل محل الدفارات، نحن راكبين في الدفار دا وخجلانين لأنو في نسوان ورجال كبار ماشين برجلينهم، والله مسافات طويلة شديد، وما معروف وصلوا وين، وفيهم ناس معوقين شايلنهم بالسراير وفي ناس شايلنهم بالكراسي أو الدرداقات، وفي ناس الدعامة جلدوهم، الزول بكون ماشي ودمو سايل، والله العظيم يعني قصص مافي زول بصدقها إلا تحصل قدامو.

رحلتنا ما انتهت في القضارف، وصلناها بعد يوم ونص، وبعد داك إتواصلت مع أهلي والناس البعرفهم طمنتهم علينا، وجازفنا موضوع الكاش، وما ارتحنا، طوالي ركبنا مشينا عطبرة لأهلنا، نقعد شوية لحدي ما الوضع يهدا، وما معروف نرجع الجزيرة متين، خلينا أي شي ورانا، بتي دي عندها كتب وامتحانات خلينا الكتب عشان المشي صعب  ومسافتو طويلة، غايتو ربنا يعوضنا ويهون.